மார்கழித் திங்கள் பத்து
மானிடர் உரிமை பேணும்
மனித உரிமை நாள்
மனித உரிமை பிறப்பின் உரிமை
மறுப்பதும் பழிப்பதும் வீணர்கள் வேலை
மனித உரிமை மறுக்கப்பட்டால்
விழிக்க வேண்டுமே உலகமும்
ஒழிக்க வேண்டும் உரிமை மீறல்களை !

புயலுக்குப் பின் அமைதி போல்
உலகப் போர்களுக்குப் பின்னே
உதயமானதே மனித உரிமை நாள்
நொந்து போன உள்ளங்களுக்கு
மருந்தானதே மனித உரிமைகள்
மகத்துவம் பேணப்படுகிறதா என்றால்
மறுப்பதற்கு ஏதுமில்லை
கேள்விக்குறி தான் !

உரிஞ்சு போன உரிமைகளால்
குலைஞ்சு போச்சே கூடுகளும்
நலிஞ்சு போச்சே நம்மினமும்
மலிஞ்சு போச்சே மனிதஉரிமை மீறல்களும்
மோதல்களும் வன்முறைகளும்
முட்டி மோதி வெடிக்கிறதே
தொடர்கதையாய் தொடர்கிறதே !

தொழிலாளர் மீது வன்முறைகள்
பெண்கள் மீதான கொடுமைகள்
சாதி மதப் பிரிவினைகள்
பாகுபாடுகள் வேறுபாடுகளென
தொடர்கிறதே தினமும் !

உருக்குலைந்து போகிறது உரிமைகள்
மறைக்கப்படுகிறது உண்மைகள்
உண்மையை உரைத்திட்டால்
உணர்வாய் எழுந்திட்டால்
தட்டிக் கேட்டால்
வெடிக்குது வன்முறை !

பாகுபாடு காட்டாது
பாரபட்சம் பார்க்காது
மனிதரை மனிதராய்
மதித்து வாழ்ந்தால்
பேணப்படுமே மனித உரிமை
மனித உரிமை பிறப்பின் உரிமை
பிறப்பின் உரிமையைப் பேணிடுவோம் !