முற்றத்துக் கவிஞன் முதுபெரும் கவிஞன்
சிற்பக்கலையிலும் சிறந்த விற்பன்னன்
கலை பண்பாட்டுக் கழகத்துப் பொறுப்பாளன்
போராட்ட வரலாற்றின் புதுவைக் கவிஞன்
போர்க்கால இலக்கியத்திற்கு புது இலக்கணம் வகுத்து
புரட்சிப் பாக்களை எழிற்சியோடு யாத்த கவிஞன்
புத்தூரில் உதித்தாரே மார்கழித் திங்கள் மூன்றினிலே !

கவிதைகளால் உரமூட்டி கானங்களால் இசைகூட்டி
விடியலுக்காய் எழிற்சியூட்டிய வித்தகக் கவிஞன்
நெருப்பான பாடல்களை விருப்போடு எழுதிக் குவித்து
வாழ்வியல் நம்பிக்கைகளை வனப்பாக்கி
அழகியல் உணர்வுகளைப் பாக்களாக்கி
விடியல் பயணத்திற்கு வீச்சாக மூச்சாக
இசைத்தாரே பாக்களை எழிற்சியோடு !

தமிழர் வாழ்விற்கு உரம் சேர்த்து
தன்மானத்திற்கு வலுச்சேர்த்து
கால நதியாகப் பயணித்து
காலத்தின் படைப்புக்களை காத்திரமாய் தந்து
காலத்தின் குரலான புதுவைக்கவி
கவியுலகிற்கு கலங்கரை விளக்கு
கவியுலகின் ஒளியினைத் தேடுகிறோம் நாமும் !

ரஜனி அன்ரன் (B.A) 03.12.2021