கலை இலக்கியவானை
வட்டமிட்ட சித்திரக் கலைஞன்
கேலிச்சித்திர நாயகன்
மாமனிதர் சிவஞானசுந்தரம்
சிரித்திரன் சுந்தரென அழைக்கப்பட்டார் சிறப்போடு
பங்குனித் திங்கள் மூன்றினிலே உதித்து
அதே பங்குனித் திங்கள் மூன்றிலே
இவ்வுலகை விட்டு ஏகினாரே !

சிரித்திர நாயகன் பத்திரிகையாளனாய்
பதிப்பாசிரியராய் படைப்பாளியாய்
ஆசிரியராய் எழுத்தாளனாய்
பன்முகத் திறனோடும் ஆற்றலோடும்
பவனி வந்தாரே கலையுலகில் !

சிந்தனைச் சிறப்பாலும்
கேலிச் சித்திரங்களாலும்
கருத்து ஓவியங்களாலும்
சிரித்திரன் இதழ் மூலம்
சிந்தனையைத் தூண்டி
ஈழத்து இலக்கியப் பரப்பை வனப்பாக்கினாரே !

சிந்தனைத் துளிகளை
சித்திரமாய் தீட்டி
சவாரித்தம்பர் மைனர் மச்சான்
மகுடி பதில்களென
அணி சேர்த்தார் இதழியலுக்கு
ஆண்டுகள் முப்பத்தியிரண்டாக
அயராமல் வெளியிட்டார் சிரித்திரனை !

ஈழத்து நகைச்சுவைக்கு
அணி சேர்த்த நகைச்சுவையாளன்
நகைச்சுவை துணுக்குகளை
நவரசமாய் அள்ளித் தந்து
அங்கதசுவையோடு அளவளாவி
அனைவரையும் மகிழ்வித்த கலைஞன் !

மொழியில்லாத கலைக்கோலத்தை
சித்திரக்கலையின் வண்ணத்தை
சிந்தனைப் பொக்கிஷத்தை
அழகியலாக்கிய கலைஞன்
கேலிச்சித்திர நாயகன்
நிரந்தரமாக விடைபெற்றாரே
பங்குனித் திங்கள் மூன்றினிலே !

ரஜனி அன்ரன் (B.A) 03.03.2021