மத்திய மியன்மாரில் இராணுவத்துக்கு எதிரான மோதல் 25பேர் உயிரிழந்துள்ளதாக மனித உரிமை கண்காணிப்பு குழு தெரிவித்துள்ளது.

தலைநகர் நய்பிடாவிற்கு வடக்கே சுமார் 300 கி.மீ (200 மைல்) தொலைவில் உள்ள மத்திய சாகிங் பிராந்தியத்தில் உள்ள டெபாயின் டவுன்ஷிப்பில் கடந்த வெள்ளிக்கிழமை இந்த சம்பவம் நடந்துள்ளது.

இந்த மோதலில் இராணுவத்திற்கு எதிராக மக்களே ஒன்று சேர்ந்து உருவாக்கி உள்ள பாதுகாப்பு படையினர் மட்டுமல்லாமல் பொதுமக்களும் உயிரிழந்துள்ளனர்.

இந்த உயிரிழப்பு எண்ணிக்கை மூலம் மொத்த உயிரிழப்பு 890ஆக உயர்ந்துள்ளதாக கண்காணிப்பு குழு தெரிவித்துள்ளது.

கிராமத்திற்குள் புகுந்த ராணுவ வீரர்கள் கண்ணில் பட்டவர்களையெல்லாம் சுட்டுத் தள்ளியதாகவும், அதனால் அனைவரும் வீடுகளை பூட்டிக்கொண்டு உள்ளே இருந்ததாகவும் பொதுமக்கள் தெரிவித்தனர்.

இறந்துபோனவர்களின் உடல்களை மீட்பதற்கு கூட வெளியேற முடியாத நிலையில் இருந்துள்ளனர். தொடர்ந்து இராணுவம் தாக்குதல் நடத்தலாம் என்ற அச்சத்தில் பலர் ஊரை விட்டு வெளியேறியுள்ளனர்.

சில பகுதிகளில் பொதுமக்கள் மாநில நிர்வாக சபைக்கு எதிராக ஆயுதங்களை எடுக்க ‘பாதுகாப்புப் படைகளை’ உருவாக்கியுள்ளனர். தளபதிகளாக தங்களைத் தாங்களே அழைத்துக் கொள்கிறார்கள்.

இவர்கள், பெரும்பாலும் வேட்டையாடும் துப்பாக்கிகள் அல்லது தற்காலிக ஆயுதங்களை வீட்டுப் பொருட்களிலிருந்து உருவாக்குகின்றார்கள்.

மூத்த ஜெனரல் மின் ஆங் ஹ்லேங்கால் தூக்கியெறியப்பட்ட தேர்ந்தெடுக்கப்பட்ட நிர்வாகத்தால் நிறுவப்பட்ட ஒரு தேசிய ஒற்றுமை அரசாங்கத்துடன் இணைந்து சில குழுக்கள் நிறுவப்பட்டுள்ளன.

பழிவாங்கலுக்கு பயந்து அடையாளம் சொல்ல விரும்பாத ஒரு டெபாயின் குடியிருப்பாளர், வெள்ளிக்கிழமை அதிகாலை நான்கு இராணுவ லொரிகள் கிராமத்தில் வீரர்களை இறக்கிவிட்டதாக கூறினார்.

தளபதிகளை எதிர்ப்பதற்காக உருவாக்கப்பட்ட உள்ளூர் மக்கள் பாதுகாப்புப் படையின் இளைஞர்கள், அவர்களை எதிர்கொள்ள முனைந்தனர். இருப்பினும், அவர்களிடம் தற்காலிக ஆயுதங்கள் மட்டுமே இருந்ததால், பாதுகாப்புப் படையினரின் தாக்குதல்களை எதிர்கொள்ள முடியவில்லை என அவர் மேலும் தெரிவித்தார்.