முன்னாள் ஜனாதிபதி ரணில் விக்ரமசிங்க மற்றும் முன்னாள் ஜனாதிபதியின் செயலாளர் சமன் ஏக்கநாயக்க ஆகியோருக்கு எதிராக குற்றப் புலனாய்வுத் திணைக்களம் (CID) தாக்கல் செய்துள்ள வழக்கு தொடர்பான அடுத்தகட்ட நடவடிக்கைகளுக்காக சட்டமா அதிபரின் ஆலோசனையைப் பெறுவதற்கென, அவ்வழக்கை எதிர்வரும் நவம்பர் 11 ஆம் திகதி மீண்டும் விசாரணைக்கு எடுத்துக்கொள்ளுமாறு கொழும்பு கோட்டை நீதிவான் நீதிமன்றம் இன்று (30) உத்தரவிட்டது.

முன்னாள் ஜனாதிபதி ரணில் விக்ரமசிங்க மற்றும் சமன் ஏக்கநாயக்க ஆகியோர் நீதிமன்றத்தில் ஆஜராக, கொழும்பு கோட்டை நீதவான் பாசன் அமரசேன முன்னிலையில் இவ்வழக்கு விசாரணைக்கு எடுத்துக்கொள்ளப்பட்டது.

விசாரணைகளின் தற்போதைய நிலை மற்றும் இவ்விவகாரத்தில் அடுத்தகட்ட நடவடிக்கைகள் குறித்து சட்டமா அதிபரின் ஆலோசனையைப் பெற வேண்டியதன் அவசியம் ஆகியவற்றைக் கருத்தில் கொண்டு நீதிமன்றம் இந்த உத்தரவைப் பிறப்பித்தது.

16.6 மில்லியன் ரூபாய்க்கும் அதிகமான பொது நிதியைத் தவறாகப் பயன்படுத்தியதாகக் கூறப்படும் குற்றச்சாட்டுகள் தொடர்பான வழக்கு இதுவாகும்.

2023 ஆம் ஆண்டில் ஐக்கிய இராச்சியத்தில் நடைபெற்ற தனது மனைவியின் பட்டமளிப்பு விழாவில் முன்னாள் ஜனாதிபதி ரணில் விக்ரமசிங்க கலந்துகொண்டதுடன் தொடர்புடைய பொது நிதி பயன்பாடு குறித்ததே இந்தக் குற்றச்சாட்டுகளாகும்.

முன்னாள் ஜனாதிபதி மற்றும் முன்னாள் ஜனாதிபதி செயலாளர் ஆகியோருக்கு எதிராக பொதுச் சொத்துச் சட்டத்தின் கீழ் இந்த வழக்குத் தொடரப்பட்டுள்ளது.

இக்குற்றச்சாட்டுகள் தொடர்பான விசாரணைகள் நிறைவடைந்துள்ளதாகவும், அது தொடர்பான விசாரணைக் கோப்புகள் மற்றும் ஆவணங்கள் மேலதிக நடவடிக்கைக்காக சட்டமா அதிபரிடம் சமர்ப்பிக்கப்பட்டுள்ளதாகவும் குற்றப் புலனாய்வுத் திணைக்களம் ஏற்கனவே நீதிமன்றத்திற்குத் தெரிவித்திருந்தது.

இவ்வழக்கு தொடர்பான நடவடிக்கைகளுக்காக முன்னிலையாகுவதற்காக ரணில் விக்கிரமசிங்க இன்று கொழும்பு கோட்டை நீதவான் நீதிமன்றத்திற்கு வருகை தந்திருந்தார்.

இவ்விவகாரம் குறித்து பரிசீலித்த பின்னர், இவ்வழக்கை நவம்பர் 11 ஆம் திகதி மீண்டும் விசாரணைக்கு எடுத்துக்கொள்ளுமாறு நீதவான் உத்தரவிட்டார்.

அன்றைய தினம் சட்டமா அதிபரின் ஆலோசனை நீதிமன்றத்திற்குத் தெரிவிக்கப்படும் என எதிர்பார்க்கப்படுகிறது.