லட்சத்தீவுக்கு மேற்கே அரேபியக் கடற்பகுதியில் சுமார் 526 கிலோ கிராம் போதைப்பொருட்களை கடத்திச் சென்ற ஈரானியப் படகு ஒன்றை இந்தியக் கடலோரக் காவல் படையும், குஜராத் பயங்கரவாதத் தடுப்புப் பிரிவினரும் இணைந்து கைப்பற்றியுள்ளனர்.

கைப்பற்றப்பட்ட இந்தப் போதைப்பொருட்களின் பெறுமதி

3,000 கோடி இந்திய ரூபாவுக்கும் அதிகம் என மதிப்பிடப்பட்டுள்ளது.

நம்பகமான உளவுத் தகவலின் அடிப்படையில் செப்டம்பர் 25 அன்று இந்த நடவடிக்கை மேற்கொள்ளப்பட்டதாக இந்திய கடலோரக் காவல்படை தெரிவித்துள்ளது.

அந்த தகவலுக்கு அமைவாக, கைப்பற்றப்பட்ட கடத்தல் பொருட்களில் ஹெரோயின் மற்றும் மெத்தாம்பேட்டமைன் (ஐஸ்) ஆகியவை அடங்கும்.

மேலும், அந்தப் படகை இயக்கிய ஐந்து பாகிஸ்தான் நாட்டவர்கள் கைது செய்யப்பட்டனர்.

கடலோரக் காவல்படையினர் கடல் மற்றும் வான்வழியாக ஒருங்கிணைந்த கண்காணிப்பை மேற்கொண்டதாகவும், சந்தேகத்திற்குரிய கப்பலைக் கண்காணித்துத் துரத்திச் சென்று, பின்னர் அந்தக் கப்பலில் ஏறியதாகவும் தெரிவித்தனர்.

கூட்டு விசாரணை மற்றும் மேலதிக சட்ட நடவடிக்கைகளுக்காக, அந்தப் கப்பல், பிடிபட்ட பணியாளர்கள் மற்றும் கைப்பற்றப்பட்ட கடத்தல் பொருட்கள் ஆகியவை பின்னர் ஆயுதமேந்திய பாதுகாப்போடு மும்பைக்கு அழைத்துச் செல்லப்பட்டன.

சந்தேகத்திற்குரிய நாடுகடந்த கடல்வழி போதைப்பொருள் கடத்தல் வலைப்பின்னல்களைக் கண்டறிந்து முறியடிக்கும் முயற்சிகளின் ஒரு பகுதியாக, இந்த நடவடிக்கை மேற்கொள்ளப்பட்டுள்ளது.

கடல் வழிகள் வழியாக போதைப்பொருட்கள் கடத்தப்படுவதைத் தடுப்பதற்காக இந்திய கடல்சார் மற்றும் சட்ட அமலாக்க முகமைகள் மேற்கொண்டு வரும் தொடர் முயற்சிகளுக்கு மத்தியில் இந்தப் பறிமுதல் நடைபெற்றுள்ளது.

சட்டவிரோத போதைப்பொருட்களைக் கொண்டு செல்வதாக சந்தேகிக்கப்படும் கப்பல்களை இடைமறிப்பதற்காக, இந்திய கடலோரக் காவல்படை இதற்கு முன்னர் குஜராத் பயங்கரவாத எதிர்ப்புப் படை மற்றும் பிற முகமைகளுடன் இணைந்து கூட்டு நடவடிக்கைகளை மேற்கொண்டுள்ளது.

கடலோரக் காவல் படையின் அதிகாரப்பூர்வ பறிமுதல் பதிவுகளின்படி, 2025 ஏப்ரலில் குஜராத் பயங்கரவாத எதிர்ப்பு படையுடன் இணைந்து மேற்கொண்ட கூட்டு நடவடிக்கையின்போது, ​​குஜராத் கடற்கரைப் பகுதியில் 307.5 கிலோ போதைப்பொருட்கள் பறிமுதல் செய்யப்பட்டமையும் குறிப்பிடத்தக்கது.