உயர்நிலைப் பாடசாலை மாணவர்கள் மற்றும் பல்கலைக்கழக மாணவர்கள் கடந்த ஐந்து வாரங்களாக முன்னெடுத்து வரும் போராட்டங்களைத் தொடர்ந்து, அவர்களின் கோரிக்கைகளுக்குப் பதிலளிக்கும் வகையில் அரசாங்கம் பல்வேறு புதிய நடவடிக்கைகளை அறிவித்துள்ளது. பிரதமர் Sébastien Lecornu, திங்கட்கிழமை 26ஆம் திகதி Matignon-இல் மாணவர் அமைப்புகளின் பிரதிநிதிகளைச் சந்தித்து கலந்துரையாடினார். இதனைத் தொடர்ந்து, கல்வி அமைச்சர் Edouard Geffray மற்றும் உயர்கல்வி அமைச்சர் Philippe Baptiste ஆகியோர் அரசாங்கத்தின் புதிய திட்டங்களை அறிவித்தனர். மாணவர்களின் கல்விச் சூழலை மேம்படுத்துவதுடன், அவர்கள் எதிர்கொள்ளும் பிரச்சினைகளுக்குத் தீர்வுகாண்பதே இந்த நடவடிக்கைகளின் நோக்கமென அரசாங்கம் தெரிவித்துள்ளது.

Parcoursup முறையில் மாற்றம் – 15,000 புதிய உயர்கல்வி இடங்கள்

பல்கலைக்கழகங்களில் அனுமதி பெறுவதற்குப் பயன்படுத்தப்படும் Parcoursup இணையத்தள முறை தொடர்பாகப் பல மாணவர்கள் அதிருப்தி வெளியிட்டு வரும் நிலையில், 2027ஆம் ஆண்டில் இந்த முறையில் குறிப்பிடத்தக்க மாற்றங்கள் மேற்கொள்ளப்பட்டு, 2028ஆம் ஆண்டில் அதற்குப் பதிலாகப் புதிய அனுமதி முறை அறிமுகப்படுத்தப்படும் என அரசாங்கம் அறிவித்துள்ளது. புதிய முறை எளிமையானதாகவும், வெளிப்படைத்தன்மை கொண்டதாகவும் அமையவுள்ளது. இதற்கான திட்டத்தை நவம்பர் மாத இறுதிக்குள் தயாரிக்க மாணவர்கள் மற்றும் ஆசிரியர்கள் அடங்கிய குழு அமைக்கப்படவுள்ளது.

இதேவேளை, உயர்கல்வித் துறையில் உடனடியாக 15,000 புதிய இடங்கள் உருவாக்கப்படவுள்ளன. அவற்றில் 10,000 இடங்கள் BTS கற்கைநெறிகளிலும், 4,000 இடங்கள் IUT தொழில்நுட்பக் கல்வி நிலையங்களிலும், 1,000 இடங்கள் மருத்துவம் மற்றும் சுகாதாரத் துறைப் பயிற்சிகளிலும் ஒதுக்கப்படவுள்ளன. குறிப்பாக, இளைஞர்களின் எண்ணிக்கை அதிகரித்து வரும் Ile-de-France பிராந்தியத்துக்கு முன்னுரிமை வழங்கப்படவுள்ளது. எனினும், மாணவர் சங்கம் கோரிய 250,000 புதிய இடங்களுடன் ஒப்பிடுகையில், அரசாங்கத்தின் இந்த அறிவிப்பு குறைவானதாகும்.

வகுப்பறைகளில் மாணவர் எண்ணிக்கை குறைப்பு – ஆசிரியர் நியமனங்கள் அதிகரிப்பு

2027ஆம் கல்வியாண்டு முதல் பொதுக் கல்வி மற்றும் தொழில்நுட்பப் பிரிவுகளைக் கொண்ட உயர்நிலைப் பாடசாலைகளில் ஒவ்வொரு வகுப்பிலும் அதிகபட்சம் 28 மாணவர்கள் மட்டுமே இருக்குமாறு நடவடிக்கை எடுக்கப்படவுள்ளது. ஆரம்பத்தில் குறைந்த வசதிகளைக் கொண்ட 50 சதவீதப் பாடசாலைகளில் இந்தத் திட்டம் நடைமுறைப்படுத்தப்பட்டு, 2028ஆம் ஆண்டில் அனைத்து பாடசாலைகளுக்கும் விரிவுபடுத்தப்படும். இதற்காகப் பொதுக் கல்வியின் இரண்டாம் நிலைத் துறையில் திட்டமிடப்பட்டிருந்த 836 ஆசிரியர் பணியிடக் குறைப்புகள் இரத்துச் செய்யப்படுவதுடன், உயர்நிலைப் பாடசாலைகளில் 500 புதிய பணியிடங்களும், BTS கற்கைநெறிகளில் 1,200 பணியிடங்களும் உருவாக்கப்படவுள்ளன.

மேலும், பாடசாலைகள் மற்றும் பல்கலைக்கழகக் கட்டடங்களைப் புனரமைப்பதற்காக அடுத்த நான்கு ஆண்டுகளில் 4 பில்லியன் யூரோக்கள் பெறுமதியான குறைந்த வட்டிக் கடன் வசதிகள் வழங்கப்படவுள்ளன. 50க்கும் மேற்பட்ட பல்கலைக்கழக வளாகங்களின் மேம்பாட்டுக்காக மேலதிகமாக ஒரு பில்லியன் யூரோக்கள் ஒதுக்கப்படவுள்ளது. அத்துடன், 2027ஆம் கல்வியாண்டு முதல் மாணவர்களுக்கான சமூக அடிப்படையிலான கல்வி உதவித்தொகைகளும் பணவீக்கத்துக்கு ஏற்ப அதிகரிக்கப்படும் என அரசாங்கம் அறிவித்துள்ளது.