ரஷ்ய ஜனாதிபதி தேர்தலில் போட்டியிடுவதற்கான சட்டத்தை, மீண்டும் புதுப்பிக்கவேண்டும் என்ற சட்டமூலம் மீதான பொது வாக்கெடுப்பில், தற்போதைய ஜனாதிபதி விளாடிமிர் புடினுக்கு ஆதரவாக பெரும்பான்மையான வாக்குகள் கிடைத்துள்ளதாக மத்திய தேர்தல் ஆணையம் தெரிவித்துள்ளது.

இதன்மூலம் விளாடிமிர் புடின், எதிர்வரும் 2036ஆம் ஆண்டு வரை ஜனாதிபதி பதவியில் நீடிப்பதற்கான வாய்ப்பு ஏற்பட்டுள்ளது. அதாவது 67 வயதான புடின் 83 வயது வரை ஆட்சி செய்ய முடியும்.

ஒரு வாரமாக நடைபெற்ற பொது வாக்கெடுப்பில், பதிவான வாக்குகளில் இதுவரை 98 சதவீத வாக்குகள் எண்ணப்பட்டுள்ளதாகும், அவற்றில் 78 சதவீதத்துக்கும் அதிகமான மக்கள் அரசியலமைப்பை திருத்துவதற்கு ஆதரவு தெரிவித்துள்ளதாகவும் 21 சதவீதத்துக்கும் அதிகமானோர் எதிராக வாக்களித்துள்ளதாகவும் தேர்தல் ஆணையம் தெரிவித்துள்ளது.

ஆணைக்குழுவின் தலைவர் எல்லா பம்பிலோவா, வாக்கெடுப்பு வெளிப்படையானது என்றும், அதிகாரிகள் அதன் ஒருமைப்பாட்டை உறுதிப்படுத்த எல்லாவற்றையும் செய்துள்ளனர் என்றும் கூறினார்.

எதிர்க்கட்சி அரசியல்வாதி அலெக்ஸி நவல்னி, இதுதொடர்பான ஒரு வித்தியாசமான பார்வையைக் கொண்டிருந்தார். புடினின் ஜனாதிபதி பதவியை சட்டப்பூர்வமாக்குவதற்காக வடிவமைக்கப்பட்ட ஒரு சட்டவிரோத மற்றும் சட்டவிரோத நிகழ்ச்சி என்று அவர் இதை விபரித்தார்.

மேலும், ‘இந்த முடிவை நாங்கள் ஒருபோதும் அங்கீகரிக்க மாட்டோம்’ என்று நவல்னி ஆதரவாளர்களிடம் கூறினார்.

நான்காவது முறையாக ரஷ்யாவின் ஜனாதிபதியாக பதவி வகித்துவரும் விளாடிமிர் புடினின் பதவிக் காலம், 2024ஆம் ஆண்டுடன் நிறைவடைகிறது.