பல தசாப்தங்களாகத் தனது தனித்துவமான பாடும் ஆளுமையால் நாட்டின் கலாச்சார மற்றும் சமூகத் துறைகளை வளர்த்தெடுத்த நந்தா மலானியின் மறைவு, அனைத்து நாட்டு மக்களின் வாழ்விற்கும் நெருக்கமாக இருந்த ஒரு தாய் போன்ற குரலின் இழப்பு என்று பிரதமர் ச.த. ஹரினி அமரசூரிய கூறுகிறார்.

மறைந்த பாடகி நந்தா மாலினி சார்பாக இரங்கல் செய்தி வெளியிடும்போது பிரதமர் இந்த அறிக்கையை வெளியிட்டார்.

இலங்கை இசைத் துறையின் ஈடு இணையற்ற பொன் குரலாகப் போற்றப்பட்டு, ஏறக்குறைய எட்டு தசாப்தங்களாகத் தனது தனித்துவமான பாடும் ஆளுமையால் நாட்டின் கலாச்சார மற்றும் சமூகத் துறைகளை வளர்த்தெடுத்த மூத்த இசைக்கலைஞரான ச.த. நந்தா மலானியின் மறைவுச் செய்தியைக் கேட்டு நான் ஆழ்ந்த அதிர்ச்சியும் மனவேதனையும் அடைந்தேன்.

நந்தா மாலனியின் இனிமையான குரலால் ஊட்டம்பெற்று, அவரது பாடல்களுடன் வாழ்க்கையின் பல்வேறு கட்டங்களைக் கடந்த ஒரு அன்பு ரசிகையாக, அவரது மறைவை, நம் வாழ்வோடு நெருக்கமாக இருந்த, வார்த்தைகளால் விவரிக்க முடியாத, கடந்தகால நினைவுகளுடன் ஆழமாகப் பிணைந்திருந்த, இன்பத்திலும் துன்பத்திலும் நமக்கு ஆறுதல் அளித்த ஒரு பரிச்சயமான தாய்மைக் குரலின் பிரிவாகவே நான் உணர்கிறேன்.

அவர் தனது குழந்தைப் பருவத்தில் “புது சாது மாமு சந்தூன் கசக் வெண்னம்” என்ற பாடலின் மூலம் இசைத்துறையில் நுழைந்து, டாக்டர் டபிள்யூ. டி. அமரதேவாவின் வழிகாட்டுதலில் “ரன்முத்து துவா” திரைப்படத்தின் மூலம் திரையுலகில் பிரவேசித்தார்.

பல பத்தாண்டுகளாக, அவரது குரல் நமது வீடுகள்,பாடசாலைகள் , தேசிய விழாக்கள் மற்றும் நமது அன்றாட வாழ்வின் ஒரு தனித்துவமான அங்கமாக விளங்கியது.

அவரது பாடும் வாழ்க்கை, இந்த நாட்டில் பாடும் கலையில் ஒரு சகாப்தத்தை உருவாக்கியது மட்டுமல்லாமல், சமூக இயக்கங்கள் மற்றும் மனித உணர்வுகளின் ஒரு உயிருள்ள வெளிப்பாடாகவும் விளங்கியது.

காதல் மற்றும் பிரிவு போன்ற அழகான மனித உணர்வுகளைப் பாடுவதையும் தாண்டி, சாமானிய மக்களின் துயரம், பயம், உரிமைகள் மற்றும் போராட்டங்களை தனது பாடல்கள் மூலம் வெளிப்படுத்துவதில் அவர் அச்சமற்றவராக இருந்தார்.

அநீதிக்கு எதிராக அவர் மௌனம் காக்கவில்லை; மாறாக, அமைதி, நல்லிணக்கம் மற்றும் சமூக நீதிக்காகத் தனது தனித்துவமான குரலை முன்னிறுத்தினார்.

“பவனா” மற்றும் “சத்திய கீதம்” போன்ற புரட்சிகரமான படைப்புகளின் மூலம், ஒரு கலைஞரால் ஒரு சமூகத்தின் உணர்வுகளைத் தட்டி எழுப்பி, ஒரு சிறந்த நாளை நோக்கி நம்மை வழிநடத்த முடியும் என்பதை அவர் நடைமுறையில் நிரூபித்தார்.

செவ்விசையில் அவர் கொண்டிருந்த ஆழ்ந்த புலமை மற்றும் ஈடு இணையற்ற குரல் ஆளுமையின் காரணமாக அவர் பெற்ற விருதுகள் மற்றும் கௌரவங்களை விட, பல தலைமுறையினரின் இதயங்களில் பதிந்திருந்த அளவற்ற அன்பு, அவரது உண்மையான கலைப் பணியின் மதிப்பை உரக்கச் சொல்கிறது.

இன்று, அவரது மறைவுக்கு நாம் துக்கம் அனுசரிக்கும் வேளையில், இலங்கை இழந்த அந்த ஈடு இணையற்ற கலைஞரின் பெயரையும், நமது வாழ்விற்கு அர்த்தம் கொடுத்த அந்த அன்புக் குரலையும் நான் மிகுந்த மரியாதையுடன் நினைவுகூர்கிறேன்.

பல பத்தாண்டுகளாக நாம் கேட்டுவந்த அந்தப் பாடல்களின் குரல் இன்று மௌனமாகிவிட்டாலும், அவர் பாடிய அழியாத பாடல்கள் நமது நினைவுகளிலும் இதயங்களிலும் என்றென்றும் வாழும்.

நம் வாழ்வில் எண்ணற்ற நினைவுகளுக்குக் குரலாக விளங்கி, இலங்கை இசையில் அழியாத முத்திரையைப் பதித்த டாக்டர் நந்தா மலானிக்கு என் மரியாதையைச் செலுத்துகிறேன், மேலும் அவரது ஆன்மா நித்திய சாந்தி அடைய பிரார்த்திக்கிறேன்.

அவரது அன்பு மகள்கள் இருவர் உட்பட அவரது குடும்பத்தினருக்கும், அவரது குரலை நேசித்த ஆயிரக்கணக்கான மக்களுக்கும் எனது ஆழ்ந்த இரங்கலைத் தெரிவித்துக் கொள்கிறேன்.