இங்கிலாந்து இளவரசர் ஹாரியின் மனைவி மேகன் மெர்கல் 2வது குழந்தைக்கு தாயாக இருக்கிறார். இதுதொடர்பாக ஹாரி தம்பதியினர் ஒரு புகைப்படத்தை வெளியிட்டனர்.

இங்கிலாந்து மகாராணி 2-வது எலிசபெத்தின் 2-வது பேரன் ஹாரி, தொலைக்காட்சி நடிகையான மேகன் மெர்கலை காதலித்து திருமணம் செய்தார்.

ஹாரி கடந்த வருடம் மார்ச் மாதம் அரச வாழ்க்கையை விட்டு விலகுவதாக அறிவித்தார். அதை தொடர்ந்து தனது மனைவியுடன் இங்கிலாந்து அரண்மனையை விட்டு வெளியேறினார். தற்போது இவர் தனது மனைவி மேகன் மெர்கலுடன் கலிபோர்னியாவில் வசித்து வருகிறார்.

ஹாரிக்கும் அவரது சகோதரர் வில்லியமுக்கு இடையே மனஸ்தாபங்கள் ஏற்பட்டதால் அரச குடும்பத்தில் இருந்து பிரிந்து சென்றதாக கூறப்பட்டது. தற்போது ஹாரி – மேகன் மெர்கல் தம்பதியினர் தனியாக வணிக நிறுவனம் நடத்தி வருகிறார்கள்.

ஹாரி தம்பதியருக்கு ஏற்கனவே ஒரு குழந்தை உள்ளது. இந்த நிலையில் ஹாரியின் மனைவி மேகன் மெர்கல் 2-வது குழந்தைக்கு தாயாக இருக்கிறார். இந்த செய்தியை ஹாரியின் செய்திதொடர்பாளர் காதலர் தினமான நேற்று தெரிவித்துள்ளார்.

இதுதொடர்பாக ஹாரி தம்பதியினர் ஒரு புகைப்படத்தை வெளியிட்டனர். ஒரு மரத்தின் கீழ் புன்னகையுடன் நிற்கிறார்கள். அதில் மேகன் மெர்கல் கர்ப்பமாக இருப்பது தெரிகிறது.

இதை உறுதிபடுத்திய செய்தி தொடர்பாளர் ஹாரியின் முதல் மகன் ஆர்க்கி பிறக்கப்போகும் குழந்தைக்கு மூத்த சகோதரனாக இருக்கப் போகிறார். 2-வது குழந்தையை எதிர்பார்ப்பதில் ஹாரி தம்பதியினர் மகிழ்ச்சி அடைந்துள்ளனர் என்று குறிப்பிட்டுள்ளார்.

கடந்த நவம்பர் மாதம் மேகன் மெர்கலுக்கு கருச்சிதைவு ஏற்பட்டதாக ஒரு பிரபல பத்திரிகையில் செய்தி வெளியானது.

இந்த நிலையில் ஹாரி தற்போது 2-வது குழந்தைக்கு தந்தை ஆகப்போவது உறுதியாகி இருக்கிறது. இதையடுத்து இளவரசர் ஹாரியின் முழு குடும்பமும் மகிழ்ச்சி அடைந்து இருக்கிறது. ‘ஹாரி தம்பதிக்கு வாழ்த்துகள்’ என்று லண்டன் பக்கிங்ஹாம் அரண்மனை செய்தி தொடர்பாளர் தெரிவித்தார்.