தெற்கு பனாமாவை வெள்ளிக்கிழமை (09) தாக்கிய 7.7 ரிக்டர் அளவிலான சக்திவாய்ந்த நிலநடுக்கம், கட்டிடங்களைச் சேதப்படுத்தியதுடன் ஆயிரக்கணக்கானோரை வீதிகளுக்கு ஓடச் செய்தது.

இருப்பினும், அந்நாடு பரவலான அழிவையோ அல்லது உயிரிழப்புகளையோ சந்திக்கவில்லை எனத் தெரிகிறது.

தலைநகரிலிருந்து சுமார் 200 கி.மீ (124 மைல்) தொலைவில் உள்ள மக்கள் நடமாட்டம் குறைவான பகுதியில் நிலநடுக்கத்தின் மையம் அமைந்திருந்ததாகவும், இது 12.6 கி.மீ (7.8 மைல்) ஆழத்தில் ஏற்பட்டதாகவும், இதனால் உயிரிழப்புகள் ஏற்பட வாய்ப்புள்ளதாகவும் அமெரிக்க புவியியல் ஆய்வு மையம் தெரிவித்துள்ளது.

அடுத்தடுத்த மணிநேரங்களில், 40-க்கும் மேற்பட்ட நில அதிர்வுகள் அந்த நாட்டை உலுக்கிய போதிலும், பனாமா கால்வாய் மற்றும் கோப்ரே பனாமா செம்புச் சுரங்கம் ஆகியவை தங்கள் செயல்பாடுகள் இயல்பாகவே இருந்ததாகத் தெரிவித்தன.

அத்துடன் டோகுமென் சர்வதேச விமான நிலையம் விமானப் போக்குவரத்து மீதான தடையை நீக்கியது.

நிலநடுக்கத்தால் ஆயிரக்கணக்கானோர் வீதிகளுக்கு வந்த நிலையில், பனாமா நகரின் மையப்பகுதியில் உள்ள உயர்தர வணிக வளாகத்தில் பணிபுரிந்தவர்கள், கடும் போக்குவரத்து நெரிசலுக்கு இடையே எவ்வாறு வீடு திரும்புவது என்று கவலையடைந்தனர்.

ஜனாதிபதி ரவுல் முலினோ, நிலநடுக்க மையத்திற்கும் பனாமா நகரத்திற்கும் இடையில் பாதியளவில் அமைந்துள்ள பெனோனோமே நகருக்குப் பயணம் செய்தார்.

அங்கு சில கட்டிடங்கள் இடிந்து விழுந்தன, ஒரு தேவாலயமும் சேதமடைந்தது.

வெள்ளிக்கிழமை ஏற்பட்ட நில அதிர்வின் தீவிரம் இருந்தபோதிலும், அப்பகுதியில் அண்மையில் ஏற்பட்ட மற்ற சக்திவாய்ந்த நிலநடுக்கங்களால் ஏற்பட்ட அழிவிலிருந்து நாடு தப்பித்ததாகத் தெரிகிறது.

உடனடியாக எந்த உயிரிழப்புகளோ அல்லது காயங்களோ பதிவாகவில்லை.

ஜூன் மாதம் வெனிசுலாவில் அடுத்தடுத்து ஏற்பட்ட நிலநடுக்கங்கள் பல ஆயிரம் பேரைக் கொன்றன, அதே நேரத்தில் ஆகஸ்ட் மாதம் கொலம்பியாவில் ஏற்பட்ட நிலநடுக்கம் 300-க்கும் மேற்பட்டோரைக் கொன்றமையும் குறிப்பிடத்தக்கது.