கடந்த வாரம் துபாய்-டெல் அவிவ் விமானத்தின் கொக்பிட்டில் (விமானி அறை) கேப்டன் ஸ்மித் மச்சார் மீது தாக்குதல் நடத்திய ‘ஃப்ளைதுபாய்’ (flydubai) விமானத்தின் துணை விமானி ஹமாம் அல்-ஹம்மனி, அவரைக் கொன்று விமானத்தைக் கடத்தி, டெல் அவிவ் நகரில் உள்ள ஒரு வானளாவிய கட்டிடத்தின் மீது மோதச் செய்து 9/11 பாணியிலான தாக்குதலை நடத்தத் திட்டமிட்டிருந்ததாக விசாரணை அதிகாரிகள் தெரிவித்துள்ளனர்.

இந்தத் தாக்குதலில் 29 வயதான ஓமன் நாட்டைச் சேர்ந்த அவர் தனியாகவே செயல்பட்டார் என்று இஸ்ரேலிய தரப்பில் நடத்தப்பட்ட ஆரம்பகட்ட விசாரணையில் தெரியவந்துள்ளதாக ‘சிபிஎஸ் நியூஸ்’ (CBS News) செய்தி வெளியிட்டுள்ளது.

செப்டம்பர் 30 அன்று கேப்டன் ஸ்மித் மச்சாரை இரகசியமாகக் கொன்று, விமானத்தின் இயந்திரங்களை நிறுத்தி, டெல் அவிவில் உள்ள ஒரு கட்டிடத்தின் மீது விமானத்தை மோதச் செய்ய அல்-ஹம்மனி திட்டமிட்டிருந்ததாக இத்தாலிய நாளிதழான ‘கொரியர் டெல்லா செரா’ (Corriere della Sera) செய்தி வெளியிட்டுள்ளது.

ஐக்கிய அரபு அமீரகத்தில் கைது செய்யப்பட்டு விசாரிக்கப்பட்டு வரும் அல்-ஹம்மனி, விமானத்தின் கேப்டனை அப்புறப்படுத்திவிட்டு, தரையிறங்குவதற்கான அனுமதியைப் பெற்று, பின்னர் டெல் அவிவ் அருகே உள்ள பென் குரியன் விமான நிலையத்தில் ஒரு கட்டிடம் அல்லது மற்றொரு விமானத்தின் மீது மோதி விபத்தை ஏற்படுத்தத் திட்டமிட்டிருந்ததாகவும், அதன்பின் விமானம் 1073-ஐ வழக்கம் போல் தொடர்ந்து இயக்க எண்ணியிருந்ததாகவும் விசாரணை அதிகாரிகளிடம் கூறியதாக இஸ்ரேலிய ஊடகங்கள் செய்தி வெளியிட்டுள்ளன.

விமானத்தின் கட்டுப்பாட்டைத் தன்வசப்படுத்த முயற்சிக்கும் முன், அது ஜோர்டான் வான்பரப்பை அடையும் வரை காத்திருக்க இணை விமானி திட்டமிட்டிருந்தார்.

எச்சரிக்கை உணர்வை ஏற்படுத்தாமல் இருப்பதற்கும், தாக்குதலை நடத்தப் போதுமான அவகாசத்தைப் பெறுவதற்கும் அவர் அவ்வாறு திட்டமிட்டதாகத் தெரிகிறது.

ஜூலை மாதத்தில் இத்தாக்குதலை நடத்த அவர் திட்டமிட்டிருந்த போதிலும், விமானக் குழுவைச் சேர்ந்த ஒருவருடன் அவருக்கு இருந்த நட்பின் காரணமாக கடைசி நேரத்தில் அத்திட்டத்தைக் கைவிட்டார் என்று இஸ்ரேலிய ஊடகங்கள் செய்தி வெளியிட்டுள்ளன.

இந்தச் சதித்திட்டம், 2001 செப்டம்பர் 11,அன்று நிகழ்ந்த அமெரிக்காவின் இரட்டைக் கோபுர தாக்குதல்களைப் போன்ற தன்மையைக் கொண்டிருந்தது.

அந்தத் தாக்குதலின்போது, ​​அல்-கொய்தா அமைப்பால் பயிற்சி அளிக்கப்பட்ட 19 கடத்தல்காரர்கள் அமெரிக்காவின் நான்கு பயணிகள் விமானங்களைக் கைப்பற்றி, அவற்றில் மூன்றை வேர்ல்ட் டிரேட் சென்டர் (World Trade Center) மற்றும் பென்டகன் (Pentagon) மீது வேண்டுமென்றே மோதச் செய்தனர். அந்தப் பெரும் தாக்குதலில் சுமார் 3,000 பேர் உயிரிழந்தமையும் குறிப்பிடத்தக்கது.