வடகிழக்கு பிரான்சின் Tomblaine நகரில் இடம்பெற்ற கொடூர விமான விபத்தொன்றில் சிக்கி, விமானி உட்பட 11 பேர் சம்பவ இடத்திலேயே பரிதாபமாக உயிரிழந்துள்ளனர்.

உள்ளூர் பாராசூட் பயிற்சிப் பள்ளி ஒன்றுக்குச் சொந்தமான சிறிய ரக விமானமே இவ்வாறு விபத்துக்குள்ளாகியுள்ளது.

பாராசூட் பயிற்சியில் ஈடுபட்டு வந்த 5 இளம் மாணவர்கள் இவ்விபத்தில் சிக்கி உயிரிழந்துள்ளனர்.

மாணவர்களுக்குப் பயிற்சி அளிப்பதற்காக விமானத்தில் பயணித்த 5 அனுபவமிக்கப் பயிற்றுனர்களும் உயிரிழந்துள்ளனர்.

இவர்களுடன் சேர்த்து விமானத்தை இயக்கிய விமானியும் உயிரிழந்துள்ளார்.

பிரான்சின் நான்சி-எஸ்ஸி (Nancy-Essey) விமான நிலையத்திலிருந்து பயிற்சியை மேற்கொள்வதற்காக இந்த விமானம் புறப்பட்டுள்ளது. எனினும், ஓடுதளத்தை விட்டு வானில் எழும்பிய சில நிமிடங்களிலேயே எதிர்பாராத விதமாக டோம்ப்லைன் பகுதியில் விமானம் விபத்துக்குள்ளாகிக் கீழே விழுந்து நொறுங்கியுள்ளது.

விபத்து நடந்த மெர்டே-எட்-மொசெல்லே நிர்வாக மாவட்டத்தில் உள்ள நான்சி-எஸ்ஸி விமான நிலையத்தைச் சுற்றியுள்ள பகுதிகளைத் தவிர்த்துக் கொள்ளுமாறு பிரான்ஸ் பொலிஸார் பொதுமக்களை அவசரமாகக் கேட்டுக்கொண்டுள்ளனர்.

விபத்து நடந்த பகுதியில் அவசரக்கால மீட்புப் படையினரும், பொலிஸாரும் தீவிர மீட்புப் பணிகளில் ஈடுபட்டு வருகின்றனர்.

அத்துடன், இந்த விபத்துக்கான காரணம் தொழில்நுட்பக் கோளாறா அல்லது மோசமான வானிலையா என்பது குறித்துப் பிரான்ஸ் விமானப் போக்குவரத்துப் புலனாய்வுப் பிரிவினர் விசாரணைகளை ஆரம்பித்துள்ளனர்.