இலங்கையில் ஆண்களை விடப் பெண்களிடையே தொற்றா நோய்களின் பாதிப்பு அதிகமாகக் காணப்படுவதாக தொகைமதிப்பு மற்றும் புள்ளிவிபரத் திணைக்களம் தெரிவித்துள்ளது.

2024 ஆம் ஆண்டின் சனத்தொகை மற்றும் வீடமைப்புத் தொகைமதிப்பு அறிக்கையின்படி, இலங்கையில் தொற்றா நோய்களின் பரவல் மற்றும் அதன் தாக்கங்கள் குறித்த விரிவான தரவுகள் பல முக்கிய சமூகப் பொருளாதாரப் போக்குகளை வெளிப்படுத்துகின்றன.

இலங்கையின் மொத்த சனத்தொகையில் ஐந்தில் ஒரு பகுதியினர், அதாவது 19.2 சதவீதமான மக்கள் (4,185,749 நபர்கள்) ஏதேனும் ஒரு வகையான தொற்றா நோயினால் பாதிக்கப்பட்டுள்ளனர்.

எஞ்சிய 80.8 சதவீதமான மக்கள் தமக்கு இத்தகைய நோய்கள் எவையும் இல்லை எனப் பதிவு செய்துள்ளனர்.

பாலின ரீதியாக நோக்கும்போது, ஆண்களை விடப் பெண்களிடையே தொற்றா நோய்களின் பாதிப்பு அதிகமாகக் காணப்படுகிறது.

பெண்களில் 21.8 சதவீதத்தினரும், ஆண்களில் 16.4 சதவீதத்தினரும் குறைந்தபட்சம் ஒரு தொற்றா நோயினால் பாதிக்கப்பட்டுள்ளனர்.

இலங்கையர்களிடையே காணப்படும் தொற்றா நோய்களில் உயர் இரத்த அழுத்தம், நீரிழிவு மற்றும் கொலஸ்ட்ரோல் ஆகிய மூன்றுமே மிக முக்கியமான சுகாதாரப் பிரச்சினைகளாக உருவெடுத்துள்ளன.

உயர் இரத்த அழுத்தம்: மொத்த சனத்தொகையில் 10.1 சதவீதமானோர் (2,200,179 நபர்கள்) இந்நோயினால் பாதிக்கப்பட்டுள்ளனர். இதுவே இலங்கையில் அதிகளவில் பதிவான தொற்றா நோயாகும்.

நீரிழிவு: சனத்தொகையில் 8.5 சதவீதமானோர் (1,850,857 நபர்கள்) நீரிழிவு நோயினால் பாதிக்கப்பட்டுள்ளனர்.

உயர் கொலஸ்ட்ரோல்: இது 8.2 சதவீதமான (1,795,939 நபர்கள்) மக்களிடையே காணப்படுகிறது.

ஏனைய நோய்களாக இதய நோய் (2.5 வீதம்), ஆஸ்துமா (1.8 வீதம்), சிறுநீரக நோய் (0.8 வீதம்), பக்கவாதம் (0.6 வீதம்), புற்றுநோய் (0.4 வீதம்), வலிப்பு (0.3 வீதம்) மற்றும் தலசீமியா (0.1 வீதம்) ஆகியவை பதிவாகியுள்ளன.

வயது அதிகரிக்கும் போது தொற்றா நோய்களால் பாதிக்கப்படும் அபாயம் குறிப்பிடத்தக்க வகையில் உயர்வடைகிறது.

35 வயதிற்குப் பிறகு இந்த நோய்களின் பரவல் வேகம் மிகத் தீவிரமாக உயர்கிறது.

30-34 வயதுப் பிரிவில் 4.7 சதவீதமாக இருக்கும் பாதிப்பு வீதம், 55-59 வயதிற்குள் 41.9 சதவீதமாக, அதாவது கிட்டத்தட்ட மூன்று மடங்காக அதிகரிக்கிறது.

60 வயதிற்கு மேற்பட்ட முதியோர் சனத்தொகையில் பாதிக்கும் மேற்பட்டோர் ஏதேனும் ஒரு தொற்றா நோயைக் கொண்டுள்ளனர். குறிப்பாக 80-84 வயதுப் பிரிவினரிடையே இது 65.9 சதவீதம் என்ற உச்சத்தை எட்டுகிறது.

14 வயதிற்கு உட்பட்ட சிறுவர்களிடையே ஆஸ்துமா (0.9 வீதம்) மிக முக்கியமான நோயாகக் காணப்படுகிறது.

60 வயதிற்கு மேற்பட்டவர்களில் உயர் இரத்த அழுத்தம் 36.4 சதவீதமாகவும், கொலஸ்ட்ரால் 27 சதவீதமாகவும், நீரிழிவு 26.8 சதவீதமாகவும் மிக அதிகளவில் காணப்படுகிறது.

இலங்கையின் மாவட்டங்களுக்கு இடையிலும், அவர்கள் வாழும் துறைகளுக்கு இடையிலும் நோய்ப் பரவலில் மாற்றங்கள் அவதானிக்கப்பட்டுள்ளன.

நகர்ப்புறங்களில் நீரிழிவு (10.4 வீதம்), உயர் இரத்த அழுத்தம் (10.3 வீதம்) மற்றும் கொலஸ்ட்ரோல் (8.9 வீதம்) ஆகியவை ஏனைய துறைகளை விட அதிகமாக உள்ளன.

தோட்டப்புறங்களில் ஆஸ்துமா (2.5 வீதம்), பக்கவாதம் (0.8 வீதம்) மற்றும் வலிப்பு (0.6 வீதம்) ஆகிய நோய்கள் ஒப்பீட்டளவில் அதிகமாகப் பதிவாகியுள்ளன.

கிராமப்புறங்களில் சிறுநீரக நோய் (0.9 வீதம்) மற்றைய இடங்களை விடச் சற்று அதிகமாகக் காணப்படுகிறது.

மாவட்ட ரீதியாக அவதானிக்கும் போது, உயர் இரத்த அழுத்தம் கேகாலை (11.7 வீதம்) மற்றும் கண்டி (11.6 வீதம்) மாவட்டங்களில் அதிகமாகவும், நீரிழிவு மற்றும் கொலஸ்ட்ரோல் கொழும்பு (10.7 வீதம், 9.1 வீதம்), கம்பஹா (10.5 வீதம், 9.6 வீதம்) மற்றும் யாழ்ப்பாணம் (10.4 வீதம், 9.9 வீதம்) மாவட்டங்களில் முன்னிலையிலும் உள்ளன.

வவுனியா (2.4 வீதம்), பொலன்னறுவை (1.9 வீதம்) மற்றும் முல்லைத்தீவு (1.7 வீதம்) மாவட்டங்களில் சிறுநீரக நோயின் தாக்கம் ஏனைய மாவட்டங்களை விட அதிகமாக உள்ளது.

ஆஸ்துமா நோய் மட்டக்களப்பு (4.4 வீதம்) மற்றும் முல்லைத்தீவு (4.2 வீதம்) மாவட்டங்களில் அதிகப் பரவலைக் கொண்டுள்ளது.

இதய நோய், சிறுநீரக நோய், பக்கவாதம் மற்றும் வலிப்பு ஆகிய நான்கு நோய்களைத் தவிர, ஏனைய அனைத்துத் தொற்றா நோய்களும் பெண்களிடையே அதிகப் பரவல் விகிதத்தைக் கொண்டுள்ளன.

குறிப்பாக உயர் இரத்த அழுத்தம் ஆண்களில் 7.3 சதவீதமாகவும் பெண்களில் 12.7 சதவீதமாகவும் காணப்படுவது ஒரு பாரிய இடைவெளியை வெளிப்படுத்துகிறது.

இந்தத் தரவுகளின் மூலம், இலங்கையின் எதிர்காலச் சுகாதாரத் திட்டமிடல்களில் வயது முதிர்ந்த சனத்தொகை மற்றும் நகர்ப்புற வாழ்க்கை முறையினால் ஏற்படும் தொற்றா நோய் சவால்களை எதிர்கொள்வது மிக அவசியமானது என்பது புலனாகிறது.