உலகப் பல்கலைக்கழகங்களின் நிலைத்தன்மை மற்றும் சுற்றுச்சூழல் செயல்திறனை மதிப்பிடும் 2026 ஆம் ஆண்டுக்கான “UI GreenMetric World University Rankings” தரவரிசையில், பேராதனைப் பல்கலைக்கழகம் இலங்கையின் முதலிடப் பல்கலைக்கழகமாகத் தனது இடத்தைத் தக்கவைத்துக் கொண்டுள்ளது.

“நிர்வாகம், டிஜிட்டல் மயமாக்கல் மற்றும் ஒருங்கிணைந்த செயல்பாடு ஆகியவற்றின் மூலம் நிலையான வளாகங்களை மேம்படுத்துதல்” என்ற கருப்பொருளின் கீழ் வெளியிடப்பட்ட இந்தத் தரவரிசையில், 110 நாடுகளைச் சேர்ந்த 2,016 பல்கலைக்கழகங்களில் பேராதனைப் பல்கலைக்கழகம் உலகளவில் 200 ஆவது இடத்தைப் பெற்றுள்ளது.

அப்பல்கலைக்கழகம் 8,262.5 புள்ளிகளைப் பெற்று இந்தச் சாதனையைப் பதிவு செய்துள்ளது.

சுற்றுச்சூழலுக்கு உகந்த மற்றும் நிலையான வளாகத்தைப் பேணுதல், நிலையான அபிவிருத்தித் திட்டங்களை நடைமுறைப்படுத்துதல் மற்றும் சுற்றுச்சூழல் பொறுப்புணர்வை ஊக்குவிக்கும் செயற்பாடுகளை முன்னெடுத்தல் ஆகியவற்றில் பேராதனைப் பல்கலைக்கழகம் தொடர்ந்து முன்னேற்றம் கண்டுள்ளதை இந்தத் தரவரிசை பிரதிபலிப்பதாக தெரிவிக்கப்பட்டுள்ளது.

இதேவேளை, களனிப் பல்கலைக்கழகம் இரண்டாவது இடத்தையும், இலங்கை திறந்த பல்கலைக்கழகம் மூன்றாவது இடத்தையும் பெற்றுள்ளன.

இந்த தரவரிசையில் சர்வதேச ரீதியில் நெதர்லாந்தின் வாகெனிங்கன் பல்கலைக்கழகம் முதலிடத்தில் உள்ளது.

UI GreenMetric தரவரிசை, பல்கலைக்கழகங்களின் நிலைத்தன்மை, சுற்றுச்சூழல் பாதுகாப்பு மற்றும் வள மேலாண்மை உள்ளிட்ட பல்வேறு முக்கியக் குறியீடுகளின் அடிப்படையில் மதிப்பீடு செய்து வெளியிடப்படுகின்றமை குறிப்பிடத்தக்கது.