ஊடகங்கள் மீதான அடக்குமுறை ஜனநாயகத்தைக் கொல்லும் என வவுனியா மாவட்ட காணாமல் ஆக்கப்பட்டோரின் உறவினர்கள் தெரிவித்துள்ளனர்.

வவுனியாவில் இடம்பெற்றுவரும் காணாமல் ஆக்கப்பட்டோரின் போராட்ட இடத்தில் இன்று (செவ்வாய்க்கிழமை) இடம்பெற்ற ஊடக சந்திப்பின் போதே உறவினர்கள் இவ்வாறு தெரிவித்தனர்.

இதுகுறித்து அவர்கள் குறிப்பிடுகையில், “பத்திரிகைச் சுதந்திரம் என்பது அரசாங்கத்தின் தணிக்கை இல்லாமல் செய்திகளைப் புகாரளிக்க அல்லது கருத்தை பரப்புவதற்கான உரிமையாகும்.

அமெரிக்காவின் அரசியல் சாசனத்தின் முதலாவது சரத்து பத்திரிகை சுதந்திரத்தின் பெரும் அரண்களில் ஒன்றாகக் கருதப்பட்டது.

பத்திரிகைச் சுதந்திரத்தை இழந்தால், அந்த இனம் அரசியல் உரிமைகளை இழக்கும். இது நீண்ட காலமாக நம் தாயகத்தில் நடந்து வருகிறது.

முல்லைதீவில் மரங்களை அழிக்கும் செயற்பாட்டை வெளிக்கொணரும் நடவடிக்கையில் ஈடுபட்ட இரண்டு தமிழ் ஊடகவியலாளர்கள் தாக்கப்பட்டுள்ளனர்.

தமிழர் தாயகத்திலிருந்து மரங்களை அகற்றுவது தமிழர்களைப் பாதிக்கும். இது இனப்படுகொலையை நிறைவேற்றுவதற்கான மற்றொரு வழியாகும். தொல்பொருள் திணைக்களத்தினர் சிங்கள மகாவம்சத்தை அடிப்படையாகக் கொண்ட போலிக் கதையின் பெயரில் எங்கள் நிலத்தை ஆக்கிரமிக்கிறார்கள்.

எனவே, பத்திரிகையாளர்கள், குறிப்பாக தமிழ் பத்திரிகையாளர் மீதான தாக்குதலை நாங்கள் கண்டிக்கிறோம். இவ்வாறான அடக்குமுறைகள் தமிழர்கள் உண்மையான தீர்வைக்காண அமெரிக்க, ஐரோப்பிய ஒன்றிய, இந்திய சக்தி மிக்க நாடுகளின் தேவையை உணர்த்துகின்றது.