Fast 3 Cycle என்ற பெயரில் முன்னெடுக்கப்பட்டதாகக் கூறப்படும் பிரமிட் வகை நிதி மோசடி தொடர்பில் பொதுமக்களிடமிருந்து பெற்றுக்கொள்ளப்பட்டதாகக் கூறப்படும் கோடிக்கணக்கான ரூபாய் பணத்திற்கு என்ன நடந்தது என்பது குறித்து விரிவான விசாரணை நடத்தப்பட வேண்டும் என தேசிய விவசாயிகள் ஒன்றியத்தின் தேசிய அமைப்பாளரும், அதனுடன் இணைந்த பிரமிட் எதிர்ப்பு படையின் தலைவருமான தரிந்து ரத்நாயக்க தெரிவித்தார்.

சந்தேகநபர் அண்மையில் கைது செய்யப்பட்டுள்ள போதிலும், அந்தக் கைதுடன் விசாரணைகள் முடிவுக்கு வந்துவிடக்கூடாது எனவும் அவர் வலியுறுத்தினார்.

இது தொடர்பில் கருத்துத் தெரிவிப்பதற்காக கடந்த முதலாம் திகதி நடத்தப்பட்ட விசேட ஊடகவியலாளர் சந்திப்பில் உரையாற்றியபோதே அவர் இவ்வாறு தெரிவித்தார்.

இந்தத் திட்டத்தின் ஊடாக பொதுமக்களிடமிருந்து எவ்வளவு பணம் சேகரிக்கப்பட்டது, எந்த முறையில் அந்தப் பணம் பெறப்பட்டது, எந்த வங்கிக் கணக்குகளில் அவை வைப்பிலிடப்பட்டன, வேறு தரப்பினருக்கு பணம் பரிமாற்றம் செய்யப்பட்டதா, இந்தச் செயற்பாட்டுடன் தொடர்புடைய ஏனைய நபர்கள் யார் என்பன தொடர்பில் விரிவான விசாரணை முன்னெடுக்கப்பட வேண்டும் என அவர் குறிப்பிட்டார்.

கடந்த ஆறு வருடங்களுக்கு அண்மித்த காலமாக இந்த விவகாரம் தொடர்பில் பல்வேறு அரசாங்கங்களுக்கும் பொலிஸ் மா அதிபர்களுக்கும் முறைப்பாடுகளை முன்வைத்து வந்துள்ளதாகத் தெரிவித்த அவர், இவ்வளவு காலமாக முறைப்பாடுகள் செய்யப்பட்டிருந்தும் சந்தேகநபர் கைது செய்யப்படுவதற்கு தாமதம் ஏற்பட்டமை பாரதூரமான கேள்விகளை எழுப்புவதாகவும் கூறினார்.

இந்த நிதி நடவடிக்கை தொடர்பான தகவல்களை முதன்முதலில் ஊடகங்கள் வாயிலாக வெளிப்படுத்தியதும், இது தொடர்பில் ஆரம்பகட்ட முறைப்பாடுகளைச் செய்ததும் தானே எனத் தெரிவித்த ரத்நாயக்க, இந்தச் சம்பவத்தினால் பாதிக்கப்பட்டவர்களுக்கு முறைப்பாடு செய்வது தொடர்பில் விழிப்புணர்வூட்டி, அவர்களைப் பொலிஸ் நிலையங்களுக்கு அழைத்துச் சென்று முறைப்பாடுகளைப் பதிவு செய்வதற்கும் உதவியதாகக் குறிப்பிட்டார்.

Fast 3 Cycle என்ற பெயரில் முன்னெடுக்கப்பட்டதாகக் கூறப்படும் இந்தத் திட்டம் ஆரம்பத்தில் ஹோட்டல் விடுமுறைப் பொதிகள் உள்ளிட்ட கவர்ச்சிகரமான சலுகைகளை வழங்குவதாகக் கூறி பொதுமக்களின் நம்பிக்கையைப் பெற்றிருந்ததாகவும் அவர் தெரிவித்தார்.

18,000 ரூபாவைச் செலுத்துவதன் மூலம் ஹோட்டல் விடுமுறைப் பொதியைப் பெற்றுக்கொள்ள முடியும் என்ற முன்மொழிவின் அடிப்படையில் இந்தத் திட்டம் ஆரம்பிக்கப்பட்டதாக ஊடகங்களில் செய்திகள் வெளியாகியிருந்ததாகவும், பின்னர் புதிய உறுப்பினர்களை இணைத்துக்கொண்டு அவர்களிடமிருந்து பெறப்படும் பணத்தை அடிப்படையாகக் கொண்ட பிரமிட் வகைத் திட்டமாக இது செயற்பட்டதாகக் குற்றச்சாட்டுகள் எழுந்துள்ளதாகவும் அவர் கூறினார்.

இந்தச் சம்பவம் தொடர்பில் 2021 ஆம் ஆண்டு ஆகஸ்ட் மாதம் 17 ஆம் திகதி பொலிஸ் மா அதிபரிடம் முன்வைக்கப்பட்ட முறைப்பாட்டின் அடிப்படையில் நிதிக் குற்ற விசாரணைப் பிரிவு விசாரணைகளை ஆரம்பித்திருந்ததாகவும் ரத்நாயக்க தெரிவித்தார்.

கொழும்பு கோட்டை நீதவான் நீதிமன்றத்தில் B 21472/2022 என்ற வழக்கு இலக்கத்தின் கீழ் இந்த விவகாரம் தொடர்பான விடயங்கள் அறிக்கையிடப்பட்டு, 2023 ஆம் ஆண்டு மார்ச் மாதம் 02 ஆம் திகதி குறித்த நபர் சந்தேகநபராகப் பெயரிடப்பட்டிருந்ததாகவும் அவர் சுட்டிக்காட்டினார்.

பொலிஸாரைத் தவிர்த்து வந்ததாகக் கூறப்படும் பிரான்சிஸ் ஹெட்டிகே அனில் அல்லது அனில் பண்டார என்பவர், கடந்த ஒக்டோபர் மாதம் 30 ஆம் திகதி ஹோமாகம, பனாகொட பகுதியில் வைத்து நிதிக் குற்ற விசாரணைப் பிரிவினரால் கைது செய்யப்பட்டதாக ஊடகங்களில் செய்திகள் வெளியாகியிருந்தன.

எனினும், சந்தேகநபர் கைது செய்யப்பட்டதுடன் விசாரணைகள் நிறுத்தப்படக்கூடாது என வலியுறுத்திய ரத்நாயக்க, குற்றப் புலனாய்வுத் திணைக்களம், சட்டமா அதிபர் திணைக்களம் மற்றும் இலங்கை மத்திய வங்கியின் நிதிப் புலனாய்வுப் பிரிவு உள்ளிட்ட சம்பந்தப்பட்ட நிறுவனங்களை இணைத்து வெளிப்படையான விசாரணை நடத்தப்பட வேண்டும் எனக் கோரிக்கை விடுத்தார்.

பல வருடங்களாகத் தங்களது பணத்தை இழந்து நீதிக்காகக் காத்திருக்கும் மக்களை மேலும் காத்திருக்கச் செய்யக்கூடாது எனவும், நிதி மோசடி தொடர்பில் குற்றச்சாட்டுகளுக்கு உள்ளானவர்களுக்கு எதிராக சட்ட நடவடிக்கை எடுப்பதுடன், பாதிக்கப்பட்ட மக்களின் உரிமைகளையும் பாதுகாப்பது சம்பந்தப்பட்ட அதிகாரிகளின் பொறுப்பாகும் எனவும் அவர் மேலும் தெரிவித்தார்.