கலகொட அத்தே ஞானசார தேரரை விடுவிக்கக் கோரி, கொழும்பு விகாரமகாதேவி பூங்காவில் பௌத்த பிக்குகள் முன்னெடுத்து வரும் சத்தியாக்கிரகப் போராட்டம் தொடர்ந்து இடம்பெற்று வருகின்றது.

போராட்டத்தில் ஈடுபட்ட பிக்குகள் நேற்று (16) பிற்பகல் விகாரமகாதேவி பூங்காவிற்கு வருகை தந்தனர்.

இதன்போது, இரவு வேளையில் அங்கு கூடாரம் அமைக்க அவர்கள் முயன்றதைத் தொடர்ந்து, பிக்குகளுக்கும் பொலிஸாருக்கும் இடையில் பதற்றமான சூழ்நிலை ஏற்பட்டது.

எனினும், கலகொட அத்தே ஞானசார தேரர் விடுவிக்கப்படும் வரை தாங்கள் அந்த இடத்தை விட்டு வெளியேறப் போவதில்லை என தித்தகல்லே ஆனந்தசிறி தேரர் தெரிவித்துள்ளார்.

ஞானசார தேரரை விடுவிக்கக் கோரி, நேற்று மாலை வரை ஜனாதிபதி செயலகத்திற்கு முன்பாகக் கூடியிருந்த பிக்குகள் குழுவினர், பின்னர் பௌத்த சாசன அமைச்சுக்கு பேரணியாகச் சென்றனர்.

அமைச்சின் செயலாளருடன் மேற்கொண்ட கலந்துரையாடல் வெற்றியளிக்கவில்லை எனத் தெரிவித்த பிக்குகள், அதனைத் தொடர்ந்து விகாரமகாதேவி பூங்காவை நோக்கிச் சென்றனர்.

“சுதந்திரத்திற்கான பாதயாத்திரை” (Nidahase Paada Yaathraa) எனப் பெயரிடப்பட்ட இந்தப் போராட்டப் பேரணி, கடந்த ஒக்டோபர் 10 ஆம் திகதி கண்டி ஸ்ரீ தலதா மாளிகை வளாகத்திலிருந்து பௌத்த பிக்குகள் குழுவினரால் ஆரம்பிக்கப்பட்டது.

மகா சங்கத்தினரின் தலைமையில், கலகொட அத்தே ஞானசார தேரரை விடுவிக்க வேண்டும் என்ற கோரிக்கையை முன்வைத்து முன்னெடுக்கப்பட்ட இந்தப் பாதயாத்திரை, நேற்று (16) கொழும்பை வந்தடைந்தமை குறிப்பிடத்தக்கது.