சமூக ஊடகப் பதிவு ஒன்றின் காரணமாக மத நிந்தனைக் குற்றச்சாட்டில் மரண தண்டனையை எதிர்கொண்டுள்ள இலங்கை நாட்டவரான சிவராசா அனோஜனுக்கு மன்னிப்பு பெற்றுத் தரும் முயற்சிகள் தீவிரமடைந்துள்ள நிலையில், இரண்டு இலங்கைத் தூதுக்குழுக்கள் சவுதி அரேபியாவுக்குப் பயணம் மேற்கொள்ளவுள்ளன.

அதன்படி, அனோஜனின் வழக்கைக் கையாளும் சட்டத்தரணிகளுடன் இணைந்து பணியாற்றவும், அவருக்கு விதிக்கப்பட்ட மரண தண்டனைக்கு எதிரான மேல்முறையீட்டை இறுதி செய்யவும், நான்கு பேர் கொண்ட சட்டக் குழுவினர் சவுதி அரேபியாவுக்குச் செல்லவுள்ளனர்.

இந்தக் குழுவில் ஜனாதிபதி சட்டத்தரணிகளான அஸார்ட் நவாவி, ஃபைஸர் முஸ்தபா மற்றும் உப்புல் குமாரப்பெருமா ஆகியோருடன், சட்டத்தரணி ஹஃபீல் ஃபாரிஸ் ஆகியோரும் அடங்குவர்.

இலங்கை வெளியுறவு அமைச்சகம் மூலம் பணியமர்த்தப்பட்ட இரண்டு சவுதி சட்ட நிறுவனங்களின் பிரதிநிதிகளைச் சட்டக் குழுவினர் சந்திக்கவுள்ளனர்.

அப்போது மேல்முறையீட்டு நடைமுறை குறித்தும், அனோஜனை விடுவிப்பதற்கான அல்லது அவரது தண்டனையைக் குறைப்பதற்கான சாத்தியமான வழிகள் குறித்தும் அவர்கள் விவாதிப்பார்கள் என்று எதிர்பார்க்கப்படுகிறது.

இதற்கிடையில், ஜனாதிபதி அநுரகுமார திஸாநாயக்கவின் கோரிக்கை மனுவை எடுத்துக்கொண்டு, அனோஜனுக்கு மன்னிப்பு கோருவதற்காக நாடாளுமன்றத்தின் சிறப்புக் குழுவொன்றும் சவுதி அரேபியாவுக்குச் செல்லும் என்று எதிர்பார்க்கப்படுகிறது.

சவூதி அரேபியாவில் பணிபுரிந்து வந்த 27 வயதான இலங்கை நாட்டைச் சேர்ந்த அனோஜன், நபிகள் நாயகத்தை அவமதிக்கும் வகையில் சமூக ஊடகங்களில் கருத்து வெளியிட்டதற்காகக் கைது செய்யப்பட்டார்.

தொடக்கத்தில், அல்-அஹ்சா குற்றவியல் நீதிமன்றம் அவருக்கு ஐந்து ஆண்டுகள் சிறைத்தண்டனையும், 30 இலட்சம் சவுதி ரியால் அபராதமும் விதித்தது.

அதனைத் தொடர்ந்து நடைபெற்ற சட்ட நடவடிக்கைகளுக்குப் பின்னர், அவருக்கு மரண தண்டனை விதிக்கப்பட்டது.

இலங்கையில் பல்வேறு மதச் சமூகங்களிடமிருந்தும் இந்த மன்னிப்பு கோரும் பிரச்சாரத்திற்கு ஆதரவு கிடைத்துள்ளது.

அனோஜனுக்கு மன்னிப்பு வழங்குமாறு விடுக்கப்பட்ட கோரிக்கைகளை இலங்கையின் பல முஸ்லிம் அமைப்புகள் ஆதரித்துள்ளன.

அதேவேளையில், பௌத்த, இந்து மற்றும் முஸ்லிம் மதத் தலைவர்களும் அவரை விடுவிப்பதற்கான நடவடிக்கைகளை மேற்கொள்ளுமாறு வலியுறுத்தியுள்ளனர்.

சர்வதேச அமைப்புகளும் இச்சம்பவம் தொடர்பாக சவுதி அதிகாரிகளிடம் கோரிக்கை விடுத்துள்ளமையும் குறிப்பிடத்தக்கது.