சவூதி அரேபியாவில் மரண தண்டனை விதிக்கப்பட்டுள்ளதாக கூறப்படும் சிவராசா அனோஜன் எனும் இலங்கையரின் பெற்றோர்கள் இன்று (21) கொழும்பிலுள்ள எதிர்க்கட்சித் தலைவர் அலுவலகத்திற்கு வருகை தந்து எதிர்க்கட்சித் தலைவரைச் சந்தித்தனர்.

இச்சந்திப்பில் சிவராசா அனோஜனின் தந்தையான தம்பிராசா சிவராசா, தாயாரான இராசமாணிக்கம் யோகலட்சுமி மற்றும் சகோதரரான சிவராசா ஹம்சிதன் ஆகியோர் கலந்துகொண்டனர்.

இவர்களுடனான கலந்துரையாடலின் போது, இலங்கைக்கான சவூதி அரேபியத் தூதுவரைத் தொலைபேசி மூலம் தொடர்புகொண்ட எதிர்க்கட்சித் தலைவர், சிவராசா அனோஜனின் விடுதலை தொடர்பான விபரங்களைக் கேட்டறிந்தார்.

அத்துடன், சவூதி சிறையில் இருக்கும் சிவராசா அனோஜனுடனும் தொலைபேசி வழியாகப் பேசி நிலமைகளைக் கேட்டறிந்த அவர், பின்னர் இலங்கையின் வெளிநாட்டு அலுவல்கள் அமைச்சின் செயலாளரைத் தொடர்புகொண்டு, அனோஜனின் விடுதலைக்காக அரசாங்கம் முன்னெடுத்துள்ள வேலைத்திட்டங்கள் குறித்தும் ஆராய்ந்தார்.

சாதி, மத பேதமின்றி சிவராசா அனோஜனின் விடுதலைக்காகச் செய்யக்கூடிய உச்சபட்ச முயற்சிகள் அனைத்தையும் மேற்கொள்வதாக அவரது பெற்றோரிடம் எதிர்க்கட்சித் தலைவர் இதன்போது உறுதியளித்தார்.