யுக்ரேனின் கார்கிவ் நகரில் உள்ள அனல் மின் நிலையம் மீதான தாக்குதலுக்குப் பின்னர், அமெரிக்க ஜனாதிபதி டொனால்ட் ட்ரம்ப் அறிவித்த எரிசக்தி தாக்குதல் நிறுத்தத்தை ரஷ்யா மீறிவிட்டதாக ஜனாதிபதி வொலோடிமிர் ஜெலென்ஸ்கி குற்றம் சாட்டியுள்ளார்.

எந்தவொரு ஒப்பந்தத்தையும் கடைப்பிடிப்பதற்கான உறுதியினை அமெரிக்கா வழங்க வேண்டும் என அவர் வலியுறுத்தியுள்ளார்.

அடுத்த மாதம் அமெரிக்காவில் நடைபெறவுள்ள இடைக்கால தேர்தல்களுக்கு முன்னதாக எரிசக்தி விலைகள் தொடர்பில் அழுத்தத்தில் இருந்த ஜனாதிபதி டொனால்ட் ட்ரம்ப், கடந்த வாரம் யுக்ரேனும் ரஷ்யாவும் எரிசக்தி போர்நிறுத்தத்திற்கு ஒப்புக்கொண்டதாக அறிவித்தார்.

இந்த நிலையில் ரஷ்யாவிடமிருந்து டீசல் வாங்குவதற்கான ஒரு ஒப்பந்தத்தையும் அவர் வெளியிட்டதால், யுக்ரேன் சீற்றமடைந்தது.

அதேவேளை, போர் நிறுத்தம் குறித்து அதன் அதிகாரிகள் சந்தேகம் வெளியிட்ட நிலையில், ரஷ்யா மீது தொடர்ந்து அழுத்தம் கொடுக்குமாறு அமெரிக்காவை ஐரோப்பிய ஒன்றியம் வலியுறுத்தியதுடன், ரஷ்யாவின் இராணுவ-தொழில்துறை வளாகத்தை இலக்காகக் கொண்ட புதிய தடைகளுக்கும் ஒப்புதல் அளிக்கப்பட்டது.

ரஷ்ய சுத்திகரிப்பு நிலையங்கள் மீதான தாக்குதல்களை ஒருதலைப்பட்சமாக நிறுத்துமாறு யுக்ரேனை நிர்ப்பந்திப்பதன் மூலம் ரஷ்யாவிற்கு சாதகமாக அமையக்கூடும் என யுக்ரேன் கருதுகிறது.

இந்த நிலையில், ஒப்பந்தத்தின் விபரங்களுக்காகத் தாம் காத்திருப்பதாக வொலோடிமிர் ஜெலென்ஸ்கி தெரிவித்துள்ளார்.

அதேவேளை, அமெரிக்க ஜனாதிபதி அறிவித்த எரிசக்தி தாக்குதல் நிறுத்தத்தை ரஷ்யா மீறியுள்ளது, என வாசோவில் நடந்த ஒரு மாநாட்டில் காணொளிக் காட்சி மூலம் ஜெலென்ஸ்கி தெரிவித்துள்ளார்.