விட்டமின் B3 உட்கொள்வதால் கருச்சிதைவு, பிறப்புக் குறைபாடு வாய்ப்புகள் குறையும்: ஆய்வு

விட்டமின் B3 உட்கொள்வதால் கருச்சிதைவு, பிறப்புக்குறைபாடுகள் ஏற்படும் வாய்ப்புகள் குறையக்கூடும் என ஆய்வாளர்கள் தெரிவித்துள்ளனர்.

எலிகளைக் கொண்டு நடத்தப்பட்ட ஆய்வு முடிவில் அவர்கள் இந்த தீர்மானத்திற்கு வந்துள்ளனர்.

உலகில் ஆண்டுக்கு 7.9 மில்லியன் குழந்தைகள் குறைபாடுகளோடு பிறப்பதால், இந்த ஆய்வின் முடிவுகள் மிகவும் பயனளிப்பதாக இருக்கும் என ஆய்வுக்குழு நம்பிக்கை வௌியிட்டுள்ளது.

காரணியையும், தடுக்கும் வழிகளையும் கண்டுபிடித்துள்ளதால் இதை இரட்டைச்சாதனை என்று சிட்னியின் விக்டர் சாங் இன்ஸ்டிட்யூட்டைச் சேர்ந்த ஆய்வாளர்கள் குறிப்பிட்டுள்ளனர்.

ஆனால், இக்கண்டுபிடிப்புகளைக் கருவுற்ற பெண்களுக்கான பரிந்துரையாக மாற்ற முடியாது என்று ஒரு வல்லுநர் குறிப்பிட்டுள்ளார்.

பலமுறை கருச்சிதைவுக்கு உள்ளான அல்லது இதயம், சிறுநீரகம், முதுகெலும்பு, மேல் அன்னம் ஆகியவற்றில் குறைபாடுகளோடு குழந்தைகளைப் பெற்றெடுத்த நான்கு குடும்பங்களின் டி.என்.ஏ.க்கள் ஆய்வுக்கு எடுத்துக்கொள்ளப்பட்டன.

இரண்டு மரபணுக்களில் ஏற்பட்ட உருமாற்றங்களால் குழந்தைகளிடம் நிக்கோடினாமைட் அடினைன் டைநியூக்ளியோடைட் (NAD- நேட்) எனப்படும் இன்றியமையாத மூலக்கூறு போதிய அளவில் இல்லாமல் இருப்பதை இந்த ஆய்வு கண்டுபிடித்தது.

உறுப்புகள் இயல்பாக வளர்ச்சி அடையவும், செல்கள் ஆற்றலை உற்பத்தி செய்யவும் இந்த மூலக்கூறு மிகவும் அவசியம்.

இதே உருமாற்றங்களை ஆய்வுக்கூட எலிகளில் உருவாக்கினார் முன்னணி ஆய்வாளர் பேரா.சாலி டன்வுட்டி. அப்போது, கருத்தரித்த தாய் எலிகளுக்கு வைட்டமின் B3 உள்ளடங்கிய நியாசின் மருந்தை செலுத்தியபோது இந்த உருமாற்றங்கள் சரியாவதை அவர் கண்டார்.

உடலில் ‘நேட்’ அளவுகளை அதிகரிக்கவும் கருச்சிதைவு, பிறப்புக்குறைபாடு ஆகியவற்றை முற்றாகத் தடுக்கவும் முடியும் என்று கூறிய அவர், குறைபாட்டுக்கான காரணியையும் அதைத்தடுக்கும் முறைகளையும் ஒரே ஆய்வில் கண்டறிவது அரிதானது என தெரிவித்துள்ளார்.

இந்தக் கண்டுபிடிப்பு உற்சாகம் தருவதாக இருந்தபோதும், இதனை கருவுற்ற, வைட்டமின் B3 குறைபாடுள்ள தாய்மார்களுக்கான பரிந்துரையாக மாற்றுவது இயலாது என்கிறார் பர்மிங்காம் பல்கலைக்கழகத்தைச் சேர்ந்த தாய்-கரு மருத்துவத் துறையின் வல்லுநர் கேட்டி மோரிஸ்.

கருவுற்ற தாய்மார்களுக்குப் பரிந்துரைக்கப்படும் ஊட்டச்சத்து அளவைப்போல பத்து மடங்கு அதிகமான டோஸ் இந்த ஆய்வில் பயன்படுத்தப்பட்டது.

பல சிக்கலான காரணங்களால் கர்ப்பகாலக் கோளாறுகள் ஏற்படுவதால் அதிக அளவில் வைட்டமின் உட்கொள்ளும் போது ஏற்படும் பக்கவிளைவுகள் இன்னும் புரிந்துகொள்ளப்படவில்லை என்று அவர் தெரிவித்துள்ளார்.

இதை ஓர் சாரமுள்ள ஆய்வு என்று குறிப்பிட்ட பிரிஸ்டல் பல்கலைக்கழகப் பேராசிரியர் ஜீன் கோல்டிங், நான்கு குடும்பங்களின் மரபணுக்களைக் கொண்டும் எலிகளிடமும் நடத்தப்பட்ட இந்த ஆய்வை மிகை மதிப்பீடு செய்யக்கூடாது என்றும் எச்சரித்துள்ளார்.






© 2015: TRT Tamil Olli, All Rights Reserved
error: நீங்கள் பிரதி செய்வது தடை செய்யப்பட்டுள்ளது !