தமிழக அரசின் விருது – ஈழத்து பேராசிரியர் ச.சச்சிதானந்தம் அவர்கள் தேர்வு

தமிழ் நாடு அரசின் உலகத் தமிழ்ச் சங்கம் வருடாவருடம் வழங்கி வரும் இலக்கியம் இலக்கணம் மற்றும் மொழியியல் துறையில் சிறந்து விளங்கும் அயலக தமிழ் அறிஞர்களுக்கான 2018 ம் ஆண்டு உலக தமிழ் சங்க மொழியியல் விருதிற்கு ஈழத்து பேராசிரியர் ச.சச்சிதானந்தம் அவர்கள் M.A,D.S,Ph.D (சச்சி தமிழர் பாடசாலை இயக்குனர்,பிரான்ஸ்) தேர்வு செய்யப்பட்டதாக தமிழ் நாடு அரசு அறிவித்துள்ளது.

எதிர்வரும் 19/02/2019 அன்று மாண்புமிகு தமிழக முதல்வர் எடப்பாடி பழனிச்சாமி அவர்களால் இந்த விருது வழங்கப்பட உள்ளது.

பிரான்ஸ் நாட்டில் பேராசிரியர்.ச. சச்சிதானந்தம் அவர்களின் சர்வதேச உயர் கல்வி நிறுவனம் (Institut International des Etudes Supérieures) கடந்த 18 ஆண்டுகளாக ஐரோப்பியத் தமிழர்களுக்கு, அண்ணாமலை பல்கலைக்கழகப் பீ.ஏ., எம்.ஏ.பட்டதாரிகளை உருவாக்கி, பலதுறைகளில் பட்டப் படிப்புக்களை நடத்தி வருவது அனைவரும் அறிந்ததே .

அத்துடன் பிரான்சில் பட்டப் படிப்புகளை வழங்கும் வகையில் தஞ்சாவூர் தமிழ் பல்கலைக்கழகமும் பிரான்ஸ் பன்னாட்டு கல்வி நிறுவனமும் இணைந்து கல்வி மற்றும் பண்பாட்டு பட்டப்படிப்பு சான்றிதழ் மற்றும் பட்டயபடிப்புகளை அளிப்பதற்கான புரிந்துணர்வு ஒப்பந்தத்தில் கையழுத்திட்டுள்ளன என்பதும் குறிப்பிடத்தக்கது.

பேராசிரியர் சச்சிதானந்தம் அவர்களின் சீரிய தமிழ் பணிகளுக்கான அங்கீகாரமாக இவ்விருதினை கருதி எமது சிறப்பான வாழ்த்துக்களை பேராசிரியர் அவர்களுக்கு தெரிவிப்பதில் ஐரோப்பிய முதல் 24 மணி நேர தமிழ் வானொலியான TRT தமிழ் ஒலி (பிரான்ஸ்) சார்பில் பெருமை கொள்கிறோம்.

மென்மேலும் பல விருதுகளை பெற்று தமிழுக்கும் ஈழத்து புலம் பெயர் தமிழர்களுக்கும் பெருமை சேர்க்க வேண்டுமென வாழ்த்தி நிற்கின்றோம்.






© 2015: TRT Tamil Olli, All Rights Reserved
error: நீங்கள் பிரதி செய்வது தடை செய்யப்பட்டுள்ளது !